Inter með 20 stiga forskot

Inter Milan náði 20 stiga forskoti á toppi ítölsku A-deildarinnar í kvöld þegar liðið lagði Parma 2-0 með mörkum frá Maxwell og Hernan Crespo. Inter er með 79 stig úr 29 leikjum á toppi deildarinnar, en Parma er í bullandi fallbaráttu.

Lazio styrkti á sama tíma stöðu sína í þriðja sæti deildarinnar með frábærum 4-2 sigri á Udinese á útivelli. Þetta var sjöundi sigur Rómarliðsins í röð í deildinni og hefur liðið fjögurra stiga forskot á Palermo sem er í fjórða sætinu.