Jörundur Svavarsson, prófessor við Háskóla Íslands og Bjarni K. Kristjánsson, frá Hólaskóla, munu halda erindi í fyrirlestraröðinni Undur Veraldar laugardaginn 3. mars. Ber erindið heitið Leyndarmál hraunanna - elstu dýr Íslands. Er það Raunvísindadeild Háskóla Íslands sem stendur fyrir fyrirlestrarröðinni. Verður erindið haldið í Öskju, náttúrufræðihúsi Háskóla Íslands, sal 132 og hefst klukkan 14:00.
Íslenskt grunnvatn var til skamms tíma talið vera líflaust. Á undanförnum árum hefur hins vegar komið í ljós að í grunnvatni í gljúpu hrauni lifa tvær tegundir marflóa. Þessar tvær tegundir finnast eingöngu á Íslandi. Í erindinu verður fjallað um útbreiðslu tegundanna og lifnaðarhætti þeirra. Verður kynnt tilgáta þess eðlis að þessar tegundir hafi lifað undir jökli á ísöldum og séu því elstu núlifandi tegundir landsins. Enn fremur verður leitað svara við spurningunni um hvaðan þessar dýrategundir komu upphaflega og hvernig þær komust til Íslands.
