BitTorrent ætla að selja löglegt efni

Veffyrirtækið BitTorrent sem löngum hefur verið talið einn helsti óvinur Hollywood fyrir að hafa fundið upp torrent-skráaskiptastaðalinn hefur nú slegist í lið með kvikmyndaiðnaðinum og ætlar að fara að selja kvikmyndir og sjónvarpsþætti á vefsíðu sinni og dreifa þeim með torrent-tækninni. Einnig er ætlunin að selja tónlist og tölvuleiki á síðu BitTorrent.

Torrent-skráaskiptaaðferðin hefur vaxið mjög í vinsældum á meðal þeirra sem skiptast ólöglega á bíómyndum, sjónvarpsþáttum, tónlist og forritum yfir internetið en með tækninni er hægt að sækja skrár frá mörgum notendum í einu. Þar sem hver notandi hleður upp aðeins broti af skrá, broti sem eitt og sér er ekki höfundarréttarvarið, hafa samtök sem berjast gegn ólöglegu niðurhali verið í miklum vandræðum með að hamla útbreiðslu skráa sem menn skiptast á með torrent-staðlinum.

Hver notandi hleður niður skrá með endingunni .torrent úr gagnagrunnum vefsíðna og veitir sú skrá upplýsingar til torrent-forrits um hvaða búta eigi að sækja og hvaða tengdir notendur bjóða bútana. Um leið og notandi er kominn með einn bút af skrá getur hann svo miðlað henni áfram til annarra notenda og fyrir vikið getur náðst mikill hraði á torrent-niðurhali, sérstaklega ef margir eru að sækja skrána í einu sem oft er tilfellið með nýja sjónvarpsþætti og bíómyndir.

Íslendingar hafa verið mjög duglegir að nýta sér torrent-tæknina og er starfrækt íslensk miðlun .torrent-skráa á vefsíðunni www.torrent.is. Þar eru yfir 10 þúsund notendur skráðir og meira en 2500 virkar .torrent-skrár í boði.