Álfaálög á dansflokknum

Hvert áfallið á fætur öðru hefur riðið yfir Íslenska dansflokkinn undanfarnar vikur, á meðan hann stóð í æfingum fyrir sýninguna Í okkar nafni, sem frumsýnd var á föstudaginn. „Það eru nokkrir eftir heilir, við skulum orða það þannig,“ sagði Valgerður Rúnarsdóttir, dansari.

Sjálf er hún með rifinn liðþófa í hné, einn dansari fór í bakinu, annar nefbrotnaði og braut úr tönn og sá þriðji sleit liðbönd í ökkla. Þar að auki hafa pestir og veikindi herjað á hópinn. Sýningin samanstendur af tveimur verkum, en í öðru þeirra eru fjórtán dansarar, jafn margir og eru í dansflokknum. „Það hafa verið á nálum, af því það er enginn eftir til að hlaupa í skarðið vegna meiðsla,“ sagði Valgerður. Það fór því svo að æfingastjóri hópsins, Gianluca Vincentini, varð að taka að sér hlutverk.

Álfar og huldufólk eru þema annars verksins, og var það orðið mál manna að einhverjir af því kyni hafi reiðst hópnum. „Við fórum í það verkefni með alls konar álfasögur í huga, og vorum að grafa upp gamlar þjóðsögur. Við sögðum einmitt við danshöfundinn, Roberto Oliván, að svona gerðist stundum hér. Fólk reyndi að byggja vegi og það gengi bara ekkert,“ sagði Valgerður. „Ég er nú eiginlega farin að hallast að því að þetta gæti bara verið,“ sagði hún og hló við. Frumsýningin fór þó fram á réttum tíma þrátt fyrir allt. „Það eru allir svo miklir fagmenn að ef eitthvað klikkar standa allir saman og leggjast á eitt. Það er þetta gamla góða: the show must go on,“ sagði Valgerður.