Miðjarðarhafsför í Þjóðleikhúsinu

Þjóðleikhúsið æfir nú af fullum krafti leikritið Hálsfesti Helenu eftir margverðlaunaðan kanadískan höfund, Carole Fréchette.

Verkið gerist á okkar tímum fyrir botni Miðjarðarhafs og er í stuttu máli stefnumót vestrænna viðhorfa við þau austrænu, séð með augum aðalpersónunnar Helenu sem kemur úr norðri.

Verkið var frumflutt í Damaskus árið 2002 þar sem líbanskur leikstjóri, Nabil El Azan, setti það á svið en hann er giftur íslenskri konu, Ragnheiði Ásgeirsdóttur leikhúsfræðingi. Þar léku hlutverkin leikarar jafnt frá Vesturlöndum sem Líbanon, Palestínu og Sýrlandi. Arnar Jónsson ætlar að leika öll karlhlutverk verksins (og svo skemmtilega vill til að hann er frændi Ragnheiðar sem gift er leikstjóranum frá Líbanon sem fyrstur setti verkið á svið!).

Aðalhlutverkið, Helenu, leikur ein af okkar allra norrænustu leikkonum, Edda Arnljótsdóttir. Eina hlutverkið sem þá er eftir, arabíska konu, leikur hin dökkbrýnda Guðrún Snæfríður Gísladóttir.

Leikstjóri er María Sigurðardóttir, leikmynd og búningar eru í höndum hinnar elegant og ítalskt menntuðu Helgu I. Stefánsdóttur. Þýðinguna úr frönsku gerði Hrafnhildur Hagalín rithöfundur sem stúderaði við Svartaskóla. Birtan kemur frá Lárusi Björnssyni ljósahönnuði.

Frumsýning er áætluð í lok mars. Verkið hefur verið sýnt m.a. víða um Kanada, í Frakklandi, Belgíu, Sviss og Senegal og í undirbúningi eru nú tvær uppfærslur í Japan og ein á Martinique.