Dýrasta bókin

Ritverk sem kallað hefur verið dýrasta bók í heimi er nú til sýnis í Þýskalandi. Vefritið Deutsche Welle greinir frá því að bók þessi sé svo viðkvæm að almenningi gefst aðeins kostur á að sjá hana í sex vikur á ári.

Bókin er frá 12. öld og geymir guðspjöllin fjögur í myndskreyttri og gullflúraðri útgáfu á 226 síðum. Ritið er kennt við prinsinn Hinrik sem ríkti í Saxlandi og Bæjaralandi á sínum tíma en hann lét gera bók þessa í kringum árið 1188 þegar nýtt altari – helgað Maríu mey – var afhjúpað í dómkirkjunni í Braunschweig.

Bókin var seld fyrir 16 milljónir evra á uppboði hjá Sotheby’s í London árið 1983 en þá hafði þýska ríkið ásamt ráðamönnum í Saxlandi og Bæjaralandi lagt á ráðin ásamt fleirum um að koma ritinu aftur til ættjarðarinnar. Enginn veit þó hver fékk þessar sextán milljónir en saga þessa gullinslegna guðræknirits er skrautleg mjög. Bókin hefur meðal annars ferðast til Prag og Hannover, haft viðkomu í Austurríki og eftir síðari heimsstyrjöld var reynt að selja hana sjálfum Englandskonungi en hann hafði ekki áhuga.

Gersemin er nú varðveitt í Herzog August bókasafninu í Wolfen-büttel, skammt frá borginni Braunschweig í neðra Saxlandi. Hún verður til sýnis fram að 18. mars.