Uppskriftir að höfundi

Félag bókmenntafræðinema í Háskóla Íslands kallar sig Torfhildi til heiðurs fyrsta íslenska atvinnuhöfundinum, Torfhildi Hólm. Á morgun verður það með málþing sem öllum er opið í Odda á háskólalóðinni, stofu 101 kl. 15. Þar verða í boði kökur á basar fyrir gesti: Kaffi og kökur í boði Torfhildar; skúffu-, gulrótar-, bláberja-, marengs- og eplakökur.

Þess utan er boðið upp á erindi og spjall um efnið: Uppskrift að höfundi. Þar taka til máls Hallgrímur Helgason en hans tillegg heitir "Lesandinn er slappur, bókin er veik en höfundurinn hress". Hávar Sigurjónsson talar um ¿Höfundinn í leikhúsinu". Rúnar Helgi Vignisson kallar sitt spjall "Egill spegill: Rúnar Helgi Vignisson heilsar upp á Egil Grímsson". Þá eru tvö tillegg frá nemendum: Arnar Sigurðsson og Atli Bollason eru með atriði: "01 - [Atli og Arnar] - Höfundurinn feat. Barthes/Foucault - PoMo REMIX.mp3" og Tinna Mjöll Karlsdóttir kemur með óvænt innslag um höfundinn út frá femínísku sjónarhorni. "Opnað verður fyrir stuttar spurningar eftir hvert erindi" segir í tilkynningu félagsins. Allir eru velkomnir.