Hinn heilagi Megas

Tónlistarkonan Magga Stína hefur gefið út plötuna Magga Stína syngur Megas. Magga Stína segir að platan hafi legið í loftinu síðan hún söng Megasarlagið Fílahirðirinn frá Súrín á afmælistónleikum Megasar í Austurbæ á síðasta ári. Eftir að lagið fór að hljóma í útvarpinu hlaut það fádæma viðtökur og varð það Möggu Stínu hvatning til að taka upp fleiri lög eftir meistarann.

„Ég hef hlustað á hann alla ævi og það er næstum því eins og hann sé heilagur maður í mínum augum," segir Magga Stína. Lögin hans eru alltaf að tala við mann, það skiptir ekki máli hvort fólk er fimm ára eða 75 ára."

Eftir að Magga Stína hafði fengið leyfi hjá Megasi til að gera plötuna fylgdist hann náið með gerð hennar. Fékk hún bunka af óútgefnum lögum frá honum til að velja úr og á endanum lentu þrjú þeirra á plötunni. „Það var ótrúlega góð og mikil hvatning sem ég fékk frá Megasi," segir hún og ber honum vel söguna.

Magga Stína hefur áður gefið út sólóplötuna An Album sem kom út árið 1998 og því löngu kominn tími til að hún gerði eigin plötu aftur. Í millitíðinni hefur hún þó gefið út með hljómsveit sinni Hringjunum.

Útgáfutónleikar vegna nýju plötunnar verða haldnir í Salnum í Kópavogi á laugardag og hefjast þeir klukkan 21.00.