Stólræður undir stýri

Pétur lumar þó á æðislegum bíl sem hann notar þegar illa viðrar til hjólreiða. "Þetta er hreint frábær Bens sem ég eignaðist eiginlega fyrir tilviljun. Ég ætlaði aldrei að aka um á eðalvagni af tegund sem margir líta á sem stöðutákn, síður en svo. Málið var bara að ég sat upp með gamlan "Hundaæði Hreim", eða Hyundai Accent, sem hafði lenti í tjóni. Þegar ég vildi selja fékkst ekki nokkur kaupandi að tíkinni fyrr en eigandi Bensins var tilbúinn að taka hann upp í. Það var tilboð sem ég gat ekki hafnað." Bílnúmerið á Bensinum er ÓHÁÐUR, en Pétur segist löngu kominn á þann aldur að geta ekki munað bókstafi og númer. "Þetta gerir það að verkum að ég þekki alltaf bílinn ef ég týni honum. Ég er ofboðslega ánægður með þennan bíl, hann tryllir með mig milli staða og eyðir ekki nema um það bil níu á hundraði ef maður heldur sig á löglegum hraða." Sem presturinn væntanlega gerir? "Ég upplýsi það hér með að ég hef verið tekinn fyrir of hraðan akstur. Ég gerði að sjálfsögðu iðrun og yfirbót og skammast mín voðalega, en ég er alltaf að reyna að vera skárri í dag en í gær." Pétur er ekki mikill bíladellukarl, fékk útrás fyrir það á traktorum í sveitinni í gamla daga. "Ég lít einfaldlega á bílinn sem samgöngutæki, og svo er reyndar fínt að semja stólræðurnar undir stýri á svona fínum bíl."