Internetið og örgeðja menn

Það sannast enn og aftur hvað netið getur verið háskalegt fyrir fljótfæra menn og örgeðja. Nú hefur Össur Skarphéðinsson neyðst til þess tvívegis á stuttum tíma að breyta pistlum á bloggsíðu sinni. Í annað skiptið var hann að fjalla um ráðningu Bryndísar Hlöðversdóttur á Bifröst - en breytti pistlinum fljótlega þegar hann sá að ýmislegt í honum virkaði stuðandi. Í hitt skiptið fjallaði hann um hugmyndir framtíðarhóps Ingibjargar Sólrúnar í skólamálum. Á þetta er bent á bloggvefnum Málbeininu og það svo tekið upp í Staksteinum Moggans í morgun. Þarna notaði Össur tækifærið til að hnýta í Ingibjörgu Sólrúnu og væna hana um dómgreindarleysi og skort á forystuhæfileikum. Pistillinn var skrifaður klukkan eitt um nótt, en um morguninn var hann horfinn. --- --- --- Vandinn er bara sá að það eru margir vakandi yfir því sem er skrifað á netið og því neyðarlegt að breyta eftir á. Við erum ekki öll eins og Björn Bjarnason sem hefur sagt að hann hafi aldrei á ævinni þurft að breyta neinu. Annar sem ætti stundum að fá sér glas af köldu vatni áður en hann setur djarfar fullyrðingar á netið er Magnús Þór Hafsteinsson. Magnús er mikill skapmaður - sem er allt í lagi, það er leiðinlegt að hafa bara ofurpassasama menn - en líklega þarf hann að gæta sín sig sérstaklega vel nú þegar hann er búinn að fá mótframboð á landsfundi flokks síns. Sjálfur hef ég ekkert alltof góðan feril á þessu sviði. Ég hef verið að skrifa á netið í á sjötta ár - og stundum hef ég sett fram hluti sem ég hef séð eftir. Í fyrravor breytti ég pistli þar sem ég hafði bendlað þekktan lögmann við hórerí. Hann fór eitthvað í taugarnar á mér um þær mundir - en fullyrðingin var náttúrlega alveg fráleit svo ég þurrkaði hana út þegar ég var búinn að anda að mér fersku lofti. --- --- --- Annars er stefna Samfylkingarinnar í skólamálum í meira lagi ruglingsleg. Fjandskapur hennar út í Áslandsskólatilraunina er með ólíkindum - flokkurinn ætti frekar að leita nýrra leiða til að auka fjölbreytni í skólastarfi en að standa vörð um miðstýrt ofstjórnunarkerfi eins og það sem er við lýði í kringum Fræðsluskrifstofu Reykjavíkur. Reyndar eru merki um að Stefán Jón Hafstein sé aðeins að bakka. Mogginn benti á þa í leiðara að hann væri hættur að kalla einkarekstur í grunnskólum "hægri öfgastefnu". Framganga kennaraforystunnar er svo í meira lagi furðuleg. Það liggur við að maður taki undir með þeim sem bendla hana við sandala, lopapeysur og afdankaðan hippisma. Nú hótar hún að hnekkja fyrir dómstólum kjarasamningi í Ísaksskóla - sem kennararnir þar eru hæstánægðir með. --- --- --- Á þriðjudaginn var ég í viðtali um skipulagsmál í þætti hjá Óskari Bergssyni á Útvarpi Sögu. Ég er nokkuð ánægður með þetta viðtal. Þið ættuð að geta hlustað á það með því að smella hérna. Meðal þess sem ég ræði þarna er mjög áhugaverð pæling - ef við myndum líta á Vatnsmýrina frá viðskiptalegu sjónarmiði og engu öðru. Hvað er svæðið mikils virði ef lóðaverðið er reiknað saman? Og á móti - hvað kostar að byggja snotran flugvöll undir innanlandsflug? Ég væri altént til í að gera þennan bisness: Að fá Vatnsmýrina undir byggingar og taka í staðinn að mér að leggja flugvöll. Geri ráð fyrir að ég yrði milljarðamæringur á fyrirtækinu. Að mörgu fleiru er vikið í viðtalinu, til dæmis byggingastílnum sem gæti hentað Laugaveginum ef kofadótið verður látið fara. --- --- --- Við Kári höfum orðið ásáttir um að ef Guttormur komi í afmælið fái hann ekki kökur, bara gras.