Hentar við kaup og sölu bifreiða

Bifreiðaskoðun Frumherja við Hestháls býður viðskiptavinum sínum upp á ástandsskoðun bifreiða, sem hentar sérstaklega þeim sem standa í kaupum eða sölu á bifreiðum. "Við ástandsskoðun er bifreiðin meðal annars prufukeyrð og tekin í gegnum fjöldann allan af prófum sem gefa nákvæma mynd af ástandi hennar. Og nákvæm skýrsla er gefin í lok skoðunarinnar," segir Svanberg Sigurgeirsson þjónustustjóri ökutækjasviðs Frumherja. Eitt af þeim prófum sem bifreiðin fer í gegnum er prófun á dempurum þar sem henni er ekið yfir sérstakan búnað með skynjara sem er tölvutengdur og sýnir niðurstöðurnar á stórum tölvuskjá. "Á skjánum sjáum við samstundis hvert ástand demparanna er. Þar kemur meðal annars fram hversu góðar festingarnar eru og hversu mikill stífleikinn er," segir Svanberg. Tölvan sem notuð er til að prófa demparana les einnig og metur upplýsingar úr öðrum prófum. Þar á meðal hvað varðar stefnu dekkjanna og ástand á bremsum. "Tækið höfum við notað í ein fjögur ár og mest er það notað við ástandsskoðun, en það er ekki í lögum um bifreiðaskoðun að demparana eigi að keyra í gegnum eins nákvæmt próf og þetta er," segir Svanberg. Ástandsskoðun er hægt að panta hvenær sem er hjá Frumherja og kostar hver skoðun 5.200 kr. kristineva@frettabladid.is