Breiðhyltingar fá sinn fisk

"Þetta er sama fiskbúð og er á Seltjarnarnesi. Það hefur gengið vel þar og því ákváðum við að færa út kvíarnar. Við ætlum að gefa okkur tíma í þessa nýju fiskbúð og auðvitað erum við með sama góða hráefnið á boðstólum og úti á Seltjarnarnesi," segir Þorkell Diego, starfsmaður fiskbúðarinnar Vegamóta sem var opnuð þann 25. október að Arnarbakka 4 til 6 í Breiðholti. "Rekstur fiskbúðar hér í Arnarbakkanum hefur aðeins dottið niður og fólk hefur næstum því afvanist fisknum. Síðan við opnuðum hefur fólk verið að láta sjá sig og þetta lítur ágætlega út þó við þurfum að sjálfsögðu að sýna þolinmæði," segir Þorkell en hann og sonur hans bjóða upp á eitthvað fyrir alla. "Það er ágætis blanda hér í hverfinu þar sem mikið af ungu fólki hefur flutt hingað á síðustu árum og margt fólk sem komið er til vits og ára hefur líka aðsetur hér og hefur sumt hvert búið hér alla ævi. Fiskréttirnir eru vinsælastir hjá okkur eins og til dæmis ýsa í karrí, sinnepssósu eða hvítlaukssósu, en tilbúnir réttir höfða frekar til yngra fólks. Fullorðið fólk er meira fyrir hefðbundna rétti og fær sér frekar heila ýsu eða stórlúðu." Í fiskbúðinni eru alltaf einhver tilboð í gangi og vill Þorkell minna fólk á að grípa gæsina þegar skötutíðin hefst. "Það verður heljarinnar veisla hér í kringum Þorláksmessu og bjóðum við upp á úrvalsskötu sem við fengum til dæmis verðlaun fyrir í fyrra. Við í fjölskyldunni erum líka Vestfirðingar og því ætti fólk að vita að við kunnum handbragðið."