Kaldaljós með flestar tilnefningar

Kvikmyndin Kaldaljós, sem Hilmar Oddsson gerði eftir samnefndri skáldsögu Vigdísar Grímsdóttur hlýtur flestar tilnefningar til Eddunnar, verðlauna Íslensku kvikmynda- og sjónvarspakademíunnar í ár. Kaldaljós er ein þriggja mynda sem tilnefndar eru sem bíómynd ársins. Hinar eru Dís eftir Silju Hauksdóttur og Næsland Friðriks Þórs Friðrikssonar. Kaldaljós var nýlega valin framlag Íslands til forvals Óskarsverðlaunanna en valið stóð á milli hennar og Dísar.

Í umsögn dómnefndar segir að í Kaldaljósi miðli skáldsöguættaður bræðingur fortíðar og samtíðar séríslenskum áhrifum þróunarsögu sem dragi dám af umhverfi síhvikullar birtu og þjóðtrúar.

Feðgarnir Ingvar E. Sigurðsson og Áslákur Ingvarsson eru báðir tilnefndir til Edduverðlauna í flokknum leikari ársins í aðalhlutverki, fyrir leik sinn í kvikmyndinni Kaldaljós. Þeir feðgar unnu í sumar til verðlauna á Festroia kvikmyndahátíð fyrir leik sinn í myndinni. Áslákur fékk verðlaun sem besti nýliðinn og Ingvar hlaut Silfur-höfrunginn sem besti leikari í aðalhlutverki. Þá eru þrjár leikkonur tilnefndar til Edduverðlauna fyrir leik sinn í Kaldaljósi, þær Helga Braga Jónsdóttir, Kristbjörg Kjeld og Snæfríður Ingvarsdóttir. Allar eru tilnefndar í flokknum leikari/leikkona ársins í aukahlutverki. Myndataka Sigurðar Sverris Pálssonar í Kaldaljósi er einnig tilnefnd til Edduverðlauna í flokknum hljóð og mynd.

Sjálfstætt fólk á Stöð 2, fréttaskýringaþáttur Sjónvarpsins Í brennidepli og Fólk með Sirrý á Skjá einum, eru tilnefndir sem sjónvarpsþættir ársins.

Idol stjörnuleit, Svínasúpan og Soaugstofan, hlutu tilnefningu í flokknum skemmtiþáttur ársins í sjónvarpi.

Páll Steingrímsson kvikmyndagerðarmaður hlýtur heiðursverðlaun akademíunnar í ár.

Hægt er að skoða tilnefningar í öllum flokkum Íslensku kvikmynda- og sjónvarpsakademíunnar hér á Vísi.

Þá verður einnig hægt að taka þátt í atkvæðagreiðslu og hefur val almennings hefur 30% vægi á móti vali þúsund meðlima akademíunnar.