Flugbátur í hnattferð væntanlegur

Gamall Dornier DO-24 flugbátur er væntanlegur til Reykjavíkurflugvallar síðdegis á leið sinni umhverfis hnöttinn, líkt og forveri hans fór fyrir 75 árum. Þá þótti það flugsögulegt afrek. Í hnattfluginu á sínum tíma sat Dornier sjálfur, eða hönnuður og smiður vélarinnar, við stýrið en að þessu sinni er það sonarsonur hans, Iren Dornier, sem stýrir för. Þessi vél er talsvert yngri og er endurgerð af þeirri gömlu. Var sú gerð í notkun vel fram á áttunda áratuginn. Vængir þessarrar vélar eru endurbættir, skrúfuþotuhreyflar leysa gömlu stjörnuhreyflana af hólmi og þessi vél er búin lendingarhjólum þannig að hún getur bæði lent á landi og sjó. Ferðin, sem hófst á Filippseyjum, er farin til að vekja athyugli á barnahjálp Sameinuðu þjóðanna, UNICEF, og mun söfnunarfé frá Dornier sjálfum og ýmsum stórfyrirtækjum renna til menntunarverkefna stofnunarinnar. Dornier er ekki óþekkt vörumerki hér á landi því Íslandsflug notar þannig vélar til innanlandsflugs. Þá hefur Ómar Ragnarsson tekið ógrynni mynda úr Dornier-vél sem hann átti og Dagfinnur Stefánsson, fyrrverandi flugstjóri, á nýuppgerðan gamlan Dornier. Þessar vélar eru þó allt annarrar gerðar en flugbáturinn.