Beikonvafinn þorskur

Þessi uppskrift er innblásin af einum besta saltfiskrétti sem ég hef fengið um ævina, en hann fékk ég nýlega á veitingahúsi hér í bæ.

Fiskurinn var borinn fram með sætri sósu og ég reyni hér að ná fram töfrum þessarar sósu. Í þessum rétti er þorskurinn ferskur, en fær saltbragð frá beikoninu. Til hátíðabrigða má nota hráskinku í stað beikonsins.

1 roðflett þorskflak um 500 kr.

6 sneiðar beikon um 400 kr.

Sósa: 4 msk.

ljós púðursykur

2 msk. sojasósa

2 msk. balsam edik

3 dl fisksoð

1 tsk. rifinn engifer

Skerið þorskflakið í fallega bita og vefjið hvern bita með einni beikonsneið. Setjið afskorninga og þunnildi í pott og útbúið fisksoð. Steikið fiskbitana á miðlungsheitri grillpönnu í ca tvær mínútur á hvorri hlið. Setjið því næst bitana í eldfast mót og bakið í 200 gráðu ofni í um 10 mínútur í viðbót. Sósan: Bræðið sykurinn í potti með þykkum botni. Takið þá pottinn af hellunni og hellið sojasósu og ediki saman við sykurbráðina og hrærið vel í um leið. Setjið pottinn aftur á helluna og bætið engifer og fisksoði saman við. Hrærið vel þar til sósan er kekkjalaus. Látið sósuna sjóða nokkra stund þar til hún þykknar örlítið - en sósan á samt að haldast nokkuð þunnfljótandi. Berið fram með salati úr káli og grilluðu grænmeti.