Olísdeildarspáin 2019/20: HK stendur á tímamótum og heldur sér uppi

Handboltatímabilið 2019 til 2020 hefst eftir aðeins þrettán daga. Íþróttadeild Vísis og Stöðvar 2 Sports telur niður í Olís deildina í handbolta með því að birta spá okkar um lokastöðuna í deildinni. Olís deild karla hefst 8. september næstkomandi og nú er komið að þriðja liðinu í spá okkar.

Spá Vísis og Stöðvar 2 Sports fyrir Olís deild karla 2019-20

1. sæti

2. sæti

3. sæti

4. sæti

5. sæti

6. sæti

7. sæti

8. sæti

9. sæti - (27. ágúst)

10. sæti - HK

11. sæti - Fram

12. sæti - Fjölnir

Íþróttadeild spáir HK 10. sæti deildarinnar og að nýliðarnir haldi sér uppi á sínu fyrsta tímabili í efstu deild síðan 2014-15.

HK varð Íslandsmeistari í fyrsta og eina sinn 2012. Tímabilið á eftir var liðið nálægt því að komast í úrslitakeppninni. Svo komu tvö skelfileg tímabil þar sem HK fékk samtals tólf stig. Undanfarin fjögur tímabil hefur liðið leikið í næstefstu deild.

Síðasta tímabil var furðulegt í meira lagi hjá HK. Liðið endaði í 6. sæti Grill 66 deildarinnar og skipti um þjálfara. Í umspilinu fóru HK-ingar svo í gang og sýndu styrk með því að vinna Víking, þrátt fyrir að lenda 2-0 undir.

Öfugt við hina nýliðana, Fjölni, hefur HK látið til sín taka á félagaskiptamarkaðnum og nánast fengið heilt byrjunarlið til sín. Nýju mennirnir þurfa að vera fljótir að aðlagast og hjálpa liðinu í fallbaráttunni sem HK verður í. 

Tímabilið í ár markar tímamót fyrir HK en handboltalið félagsins leika núna heimaleiki sína í Kórnum en ekki í Digranesi.



Komnir/Farnir:

Komnir:

Ásmundur Atlason – Grótta

Kristófer Andri Daðason – Víkingur

Þorgeir Bjarki Davíðsson – Fram

Eíríkur Guðni Þórarinsson – Valur

Giorgi Dikhaminjia - Struga Macedonia

Kristján Ottó Hjálmsson - til baka úr láni frá Haukum

Davíð Svansson - Molde, Noregi

Farnir:

Elías Björgvin Sigurðsson – Þýskaland

Guðmundur Árni Ólafsson - Afturelding

Þórður Rafn Guðmundsson – Hættur

Ingvar Ingvarsson - Þróttur

HBStatz tölurnar frá síðasta tímabili

HK-ingar hafa ekki spilað í efstu deild undanfarin fjögur tímabil og þetta verður því fyrsta tímabil HK-liðsins með HBStatz.

HK skoraði 27,6 mörk að meðaltali í Grill 66 deild karla á síðustu leiktíð og fékk á sig 27,1 mark að meðaltali.

Liðið vann 8 af 18 deildarleikjum sínum en í úrslitakeppninni vann liðið fimm af átta leikjum þar af þrjá þá síðustu eftir að hafa lent 2-0 undir í úrslitaeinvíginu á móti Víkingum.

Líklegt byrjunarlið HK í vetur

Markvörður - Davíð Svansson - 34 ára

Vinstra horn - Kristófer Dagur Sigurðsson - 21 árs

Vinstri skytta - Blær Hinriksson - 18 ára

Miðja - Bjarki Finnbogason - 22 ára

Hægri skytta - Giorgi Dikhaminjia - 22 ára

Hægra horn - Þorgeir Bjarki Davíðsson - 23 ára

Lína - Eiríkur Guðni Þórarinsson - 19 ára

Varnarmaður - Pálmi Fannar Sigurðsson - 23 ára

Fylgist með

Blær Hinriksson (f. 2001) er kannski þekktari sem leikari og sló eftirminnilega í gegn í hinni margverðlaunuðu kvikmynd, Hjartasteini. En hann er líka góður handboltamaður sem fær sitt fyrsta tækifæri í efstu deild í vetur.

Blær er afar sterkbyggður og góður maður gegn manni. Þá er hann öflugur varnarmaður. HK-ingar binda miklar vonir við strákinn í vetur.

Þjálfarinn

Elías Már Halldórsson er nýr þjálfari HK og þreytir frumraun sína í vetur sem þjálfari karlaliðs. Eftir að skórnir fóru á hilluna tók hann við kvennaliði Hauka 2017. Á fyrra tímabilinu komust Haukar í bikarúrslit og féllu naumlega úr leik fyrir Val í undanúrslitum Olís-deildarinnar. Skömmu fyrir lok síðasta tímabils hætti Elías óvænt með Hauka og einnig sem aðstoðarþjálfari kvennalandsliðsins.

Elías átti farsælan feril sem leikmaður og vann fjölda titla með Haukum þar sem hann lék lengst af. Hann lék einnig með HK og þekkir því vel til hjá félaginu.





Hvað segir sérfræðingurinn?„Þetta er það lið sem maður veit hvað minnst um á þessum tímapunkti. Þetta er ungt og efnilegt lið en þeir eru kannski að ég held einu ári á undan áætlun að vera komnir upp í efstu deild. Það eru engu að síður búnir að vera mjög spennandi tímar í Kórnum í sumar því HK er búið að gera frábæra hluti í fótboltanum og ég reikna með því að það sé mikil stemmning í hverfinu og fyrir liðinu,“ segir Guðlaugur Arnarsson, sérfræðingur Stöðvar 2 Sports, um HK-liðið.

„Þetta eru ungir og efnilegir strákar. Það verður þannig spennandi að fylgjast með Blæ Hinrikssyni. Þetta öflugur strákur í vörn og sókn og mikill leiðtogi. Það er það sem liðið þarf á halda. Hann þarf að stíga upp og fleiri í liðinu. Þjálfarateymið er svolítið óskrifað blað í karlaboltanum en hafa gert fína hluti kvennamegin. Það er mikil leikreynsla í þeim því þeir voru báðir öflugir leikmenn. Það verður mjög fróðlegt að sjá hvernig HK kemur til leiks,“ sagði Guðlaugur.

Hversu langt er síðan að HK ...

... varð Íslandsmeistari: 7 ár (2012)

... varð deildarmeistari: Aldrei

... varð meðal þriggja efstu í deildinni: 10 ár (2009)

... varð bikarmeistari: 16 ár (2003)

... komst í bikarúrslit: 14 ár (2005)

... komst í úrslitakeppni: 7 ár (2012)

... komst í undanúrslit: 7 ár (2012)

... komst í lokaúrslit: 7 ár (2012)

... féll úr deildinni: 4 ár (2015)

... kom upp í deildina: Nýliði í ár

Gengi HK í deildarkeppninni undanfarin átta tímabil

2018-19  B-deild (6. sæti)

2017-18  B-deild (4. sæti)

2016-17  B-deild (6. sæti)

2015-16  B-deild (5. sæti)

2014-15  10. sæti í deildinni

2013-14  8. sæti í deildinni

2012-13  4. sæti í deildinni

2011-12  4. sæti í deildinni

Gengi HK í úrslitakeppninni undanfarin átta tímabil

2018-19  B-deild

2017-18  B-deild

2016-17  B-deild

2015-16  B-deild

2014-15  Ekki í úrslitakeppni

2013-14  Ekki í úrslitakeppni

2012-13  Ekki í úrslitakeppni    

2011-12  Íslandsmeistari

Að lokum

Leikmannahópur HK er mun sterkari en á síðasta tímabili. Bæði eru nýir leikmenn komnir og aðrir aftur á gólfið eftir erfið meiðsli. Breiddin er þokkalega mikil og í liðinu eru spennandi leikmenn á borð við Blæ, Kristófer Dag Sigurðsson og Eirík Guðna Þórarinsson. Georgíska hægri skyttan Giorgi Dikhaminjia þarf hins vegar að spila betur en hann hefur gert á undirbúningstímabilinu.

HK þurfti að styrkja sig enda lenti liðið í 6. sæti Grill 66 deildarinnar á síðasta tímabil, endaði fyrir neðan tvö ungmennalið og fékk 14 stigum minna en Fjölnir. Mikið vatn hefur runnið til sjávar á nokkrum mánuðum og HK-ingar eru mættir aftur í efstu deild, þar sem þeir vilja vera.

Síðustu tvö tímabili HK í efstu deild voru vandræðaleg en liðið ætti að vera nokkuð samkeppnishæft í vetur og möguleikinn á að halda sér uppi er ágætur.